Жакында эле коңшу Казакстанда мусулмандар дин башкармалыгынын Аалымдар кеңеши "биткоин" криптовалютасына тыюу салган фатва чыгарды.

Чечим "биткоин" криптовалютасына гана тиешелүү болгон. Маалыматта айтылгандай, ал шарияттын принциптерине туура келбейт. "Биткоин" мамлекет тарабынан көзөмөлгө алынбайт, анын баасын кармап тура турган эч кандай активдер жок жана шылуунчулук кылууга тобокелчилик көп. Мындан улам аны колдонууга тыюу салынган.

Кыргызстандын мусулмандарынын Аалымдар Кеңешинин катчылыгы "Акчабарга" билдиргендей, Аалымдар Кеңеши 2021-жылы эле криптовалютага тыюу салган фатва чыгарган.

Криптовалюта кармаганга болбогон, көзгө көрүнбөгөн, эч нерсе менен, мисалы алтын менен камсыздалбаган акча болгондуктан, аны көзөмөлдөгөн, чыгарган орган жок болгондуктан, баасы бат өзгөрүп, туруктуу наркы болбогондуктан, аны пайдаланууга, ал менен иштөөгө тыюу салуу чечими чыгарылган.