5-сентябрдан тарта Министрлер кабинетинин “Чет элдик жарандардын жана жарандыгы жок адамдардын республиканын аймагында жүрүүсүнүн маселелери жөнүндө” токтому күчүнө кирет. Ал Россия, Казакстан, Тажикстан, Армения, Беларусь жана башка бир катар мамлекеттердин жарандарынын Кыргызстанда жүрүүсүн жөнгө салат. 

Санариптик өнүктүрүү министрлиги мындай жарандардын Кыргызстанда 60 календарлык күндөн ашык мөөнөткө иштөөгө, окууга же жеке ишкерликке байланышпаган жеке максаттарда жүрүүсүнүн жаңы тартибине көңүл бурат. 

Буга чейин аталган өлкөлөрдүн жарандарын каттоо андан ары узартуу укугу менен алты айга чейинки мөөнөткө жүргүзүлчү. Мындан ары жеке максаттар үчүн каттоо жана узак мөөнөткө болуу мөөнөтүн узартуу төмөнкү документтердин негизинде гана мүмкүн болот: 

- туруктуу жашоого уруксат кагазы 

- жарандыгы жоктугу тууралуу күбөлүк 

-"Кайрылман" күбөлүгү 

-"Мекен карт" күбөлүгү. 

ЕАЭБдин жарандары (Армения, Беларусь, Казакстан, Россия) кошумча документтерсиз Кыргызстанда өлкөгө кирген учурдан тартып ар бир 180 күндүк мөөнөттө 90 күнгө чейин жүрө алышат. Тажикстандын, Грузиянын, Азербайжандын жана Молдованын жарандары кирген күндөн тартып ар бир 120 күн ичинде 60 күнгө чейин каттоосуз жүрө алышат. 60 же 90 күн өткөндөн кийин каттоодон өтө элек жарандар Кыргызстандын аймагынан чыгып кетүүгө аргасыз болушат. Кайрадан кирүү 60 же 90 календарлык күндөн кийин мүмкүн. 

Токтомдо жеке максатта жүргөн жарандарга убактылуу жашоого уруксат берүү да каралган. Ал 15 жумушчу күндүн ичинде чыгарылат жана жыл сайын узартуу мүмкүнчүлүгү менен бир жылга жарактуу, бирок беш жылдан ашык эмес. 

Санариптик өнүктүрүү министрлиги Кыргызстанга кирген учурдан тартып Россиянын, Казакстандын, Беларустун, Армениянын жарандары белгилүү бир мөөнөткө милдеттүү каттоодон бошотуларын эскертет: 30 күн; Азербайжан - 15 күн; Тажикстан – 60 күн; Грузия - 90 күн. Молдова жарандары Кыргызстанга кирген күндөн тартып беш жумушчу күндүн ичинде каттоодон өтүшү керек.