Эмгек, социалдык коргоо жана миграция министрлигинде аялдардын лидерлигин колдоо боюнча мамлекеттик программаны ишке ашырууга жооптуу мамлекеттик органдардын жыйыны өттү. Бул тууралуу ведомствонун басма сөз кызматы билдирди.

Министрдин орун басары Кыял Жанузакованын айтымында, бул программа аялдардын мүмкүнчүлүктөрүн кеңейтүүгө жана алардын жергиликтүү өз алдынча башкаруу органдарынан баштап жогорку мамлекеттик органдарга чейинки бардык деңгээлдеги чечимдерди кабыл алуу процесстерине катышуусун колдоого багытталган.

"Биздин жалпы күч-аракетибиз аялдарга өзүн көрсөтүүгө, өз дараметин ишке ашырууга жана өлкөнүн өнүгүшүнө салым кошууга мүмкүндүк берүүчү шарттарды түзүүгө багытталышы керек. Буга жетишүү үчүн билим берүү программаларын жана аялдар үчүн атайын тренингдерди киргизүү зарыл. Алардын чечимдерди кабыл алуу процесстерине катышуу деңгээлин жогорулатуу, аялдардын лидерлик орундарын ээлөөсүнө тоскоол болгон тоскоолдуктарды жана дискриминациялык практиканы жоюу", - деди ал.

Жыйындын жыйынтыгында Кадр кызматы боюнча мамлекеттик агенттиктин өкүлү ачык сынактын натыйжасында облустук жана муниципалдык кадрдык резервге алынган аялдардын үлүшү дээрлик 30%га өскөнүн белгиледи. Башка мамлекеттик органдардын өкүлдөрү да мамлекеттик программанын аткарылышы боюнча маалымат беришти.

"Кийинки жылдын негизги милдеттеринин бири – аялдарды жетекчилик кызматтарга даярдоо жана кызматка дайындалгандан кийин алардын квалификациясын жогорулатуу системасын калыптандыруу", - деп сөзүн жыйынтыктады министрдин орун басары.