2025-жылдын 16-февралында Кыргызстанда ипотека жана ата мекендик өнөр жай продукциясын баштапкы төлөмсүз сатып алууга уруксат берген мыйзам күчүнө кирген. Тиешелүү өзгөртүүлөр “Кыргыз Республикасындагы кепилдик фонддор жөнүндө” мыйзамга киргизилди.

Документ Жогорку Кеңеш тарабынан 2024-жылдын 26-декабрында кабыл алынып, президент Садыр Жапаров 2025-жылдын 27-январында кол койгон. Эми жарандар “Кепилдик фонду” ААК менен кызматташкан бардык банктарда турак жайды кредитке сатып алууда кепилдик колдоодон пайдалана алышат.

Мындан тышкары, кепилдиктер мамлекеттик программалардын алкагындагы кредиттерге, бюджеттик кредиттерге жана өз алдынча иш менен алектенген жарандарга карата колдонулат. Бул чара калктын турак жайды каржылоого жана бизнести өнүктүрүүгө жетүүсүн жеңилдетүү үчүн багытталган.