Жарыяланган
2024-20-11, 12:30Жогорку Кеңеште Министрлер кабинети менен Япония өкмөтүнүн ортосундагы алмашуу ноталарын, ошондой эле JICA менен гранттык макулдашууну ратификациялоо тууралуу мыйзам долбоору каралып, үч окууда кабыл алынды.
2024-жылдын 1-августунда Бишкек шаарында кол коюлган документтер “Эл аралык аэропорттордо аба кыймылын башкаруунун объекттерин жакшыртуу” долбоорун ишке ашырууга тиешелүү.
Келишимге ылайык, JICA 2 миллиард 153 миллион жапон йени (болжол менен 1 миллиард 147 миллион 256 миң 662 сом) өлчөмүндө грант бөлөт.
Каражат Ош аэропортунда жаңы аэронавигациялык мунаранын курулушуна жана “Манас”, “Ысык-Көл” аэропортторунун аэронавигациялык жабдууларын модернизациялоого жумшалат.
Долбоор Кыргызстанда аба кыймылын башкаруунун коопсуздугун, натыйжалуулугун жана ишенимдүүлүгүн жогорулатууга багытталган. Ал өлкөнүн авиациялык инфраструктурасын өнүктүрүүгө жана эл аралык авиациялык кызматтарды чыңдоого чоң салым кошоору күтүлүүдө.