Жогорку Кеңештин маалымат кызматы депутаттарга сатып алына турган кызматтык унаалар боюнча түшүндүрмө берди.  

Парламенттин маалымат кызматы билдиргендей, азыркы тапта 20 айым депутат кызматтык унаа менен жүрөт. Алардын айдоочуларынын айлык акысы мамлекеттин эсебинен эмес, депутаттын жеке фондунан төлөнүп келет. 

"Ал эми калган 70 депутатты унаа менен камсыздоо иши да так эле ушундай шартта жүргүзүлөрү мерчемделүүдө. Бирок кайсы үлгүдөгү  унаа алынып келинери азырынча толук чечиле элек", - деп айтылат маалыматта. 

Эскерте кетсек, депутаттар 2015-жылы кызматтык унаадан баш тарткан. 2022-жылы  парламенттин чечими менен айым депутаттарга Toyota Camry унаалары бериле турган болгон. 

Жогорку Кеңештин төрагасынын орун басары Нурбек Сыдыгалиев 2024-жылы депутаттарга кайрадан кызматтык унаа берүүнү сунуштап, мыйзам долбоорун даярдаган.