Бишкекте Батыш автобекети жабылып, анын ордуна Алма-Ата көчөсү менен Айланма жолдун кесилишине жакын жерде жана Ак-Кула ат майданынын жанында убактылуу автобекет иштөөдө. “Акчабардын” кабарчылары Ысык-Көлгө, Ошко же башка аймактарга кантип барса болорун көрүп кайтты.

Октябрдын аягында Бишкектеги Батыш автобекети биротоло жабылып, жарандарга Фучик көчөсүнүн батыш тарабына курууну пландап жаткан жаңы автобекеттин эскиздери сунушталган. Ал 162 гектар аянтты ээлейт. Айтмакчы, ал жерге Ош базары курулат. Ошондой эле, Айланма жолдогу автобекет иштеп жатат, бул социалдык тармактарда бир топ талаш-тартыштарды жаратты. 

Бирок алгач биз шаардын батыш тарабында жайгашкан, тыгындарды жоюу максатында жабылган эски Батыш автобекетине бардык.

Эски автобекет адаттан тыш ээн көрүндү. Бул жерде автобус да, такси да жок. Кассалар жабылган, күтүү залы бош. Бирок кээ бир шаардыктар дагы эле аймактарга кетиш үчүн бул жерге келишкенине жана автобекет көчүрүлгөнүн билбегендер бар экенине күбө болдук. Аймактарга кантип кетүүгө болот?

Аймактарга кетүүнүн бир нече жолу бар. Учурда Ак-Кула ат майданынын жанында убактылуу автобекет иштеп жатат.
Убактылуу автобекеттер ар башка локацияда жайгашкан. Маселен, Ош же Жалал-Абадга барууну көздөсөңүз, ал үчүн ат майдандын жанында жайгашкан автобекетке барышыңыз керек. 

Биз автобекетке келгенибизде ат майданда улуттук оюн ойнолуп жаткандыктан, айланасында унаалар жык-жыйма экен. Ал эми жүргүнчүлөрдү бир нече автобус гана күтүп туруптур. Убактылуу автобекеттен Ош, Жалал-Абад, Баткен, Таласка барууга болот. Бул жерден 2 миң 200 сомго Ташкентке автобус менен сапар алса болот.

Убактылуу автовокзалга №18 жана 40-автобустар кетет. Жол акысы накталай 20 сом, электрондук төлөм 17 сом. Бул жерден Алма-Ата менен Айланма жолдун кесилишине жакын жайгашкан Бишкек автовокзалына жетүүгө болот.

Автобекетке өз убагында жетүү үчүн жол тыгынын эске алуу керек. Ал жакка жетүү үчүн бир сааттан ашык убакыт талап кылынат жана биз ал жакка барганыбызда караңгы кирип калган, эл көп экен.

Автобекетте автобустарга билет сатып ала турган касса бар, мисалы, Алматыга автобус менен барууга болот. Бул жерде айдоочуларды текшерген нарколог да иштейт, ошондой эле наристеси бар энелер үчүн да атайын бөлмө ачылган. Биз барганда автобекетте эл көп экен. Жүргүнчүлөрдү жеке кичи автобустар күтүп турду. 

Бул жерден Ысык-Көлгө жана Нарынга барууга болот. Баса, Караколго 500 сомдон кетүүгө болот. Ошондой эле, каалагандар такси кызматын да колдоно алышат.