Кыргызстанда жарандар пенсияга 5 жылдык минималдык эмгек стаж менен чыга алат. 

Былтыр 1-июлда мыйзамга өзгөртүүлөр кирип, анда аялдар 58 жашында, эркектер 63 жашында (пенсияга чыгуу курагы өзгөргөн жок — ред.) 5 жылдык стаж менен пенсияга чыга алары каралган. Ага чейин пенсияга чыгуу үчүн аялдарда 20, эркектерде 25 жылдык стаж болушу керек болгон.

5 жылдык минималдык стаж деген талап 2024-жылдын 1-июлунан 2025-жылдын 31-декабрына чейин иштейт. 2026-жылдын 1-январынан тарта минималдык стаж 6 жыл болот. Минималдык стаж жыл сайын көтөрүлүп отуруп, 2045-жылдан тарта талап кылынган стаж 20 жыл болуп калат.

Эмгек стажды эсептөөдө жарандын иштеген жылдары эске алынат: 1996-жылга чейинки маалымат эмгек китепчесинен алынат, 1996-жылдан кийинкиси камсыздандыруу төгүмдөрүн төлөгөнү каралат.

Андан тышкары камсыздандыруу төгүмдөрү төгүлбөгөн учурлар да – окуу жайда билим алган (диплом болушу шарт), баласын үйдө карап отурган (3 жашка чейин), аскерде кызмат өтөгөн, ишсиз катары каттоодо туруп, жумушсуздук боюнча жөлөкпул алган жана майып балдарын баккан мезгил эмгек стаж катары эсептелет. 

Жетиштүү стажы болбогондор пенсия чыга албайт. Алар карылык боюнча жөлөкпул алышат. 

Социалдык фонд жашы курагы келгенде пенсия алуу үчүн жарандарды камсыздандыруу төгүмдөрүн төгүүгө үндөп келет.