Мамлекеттик ипотекалык компания (МИК) 2016-жылы түзүлгөндөн бери 2024-жылдын аягына чейин коммерциялык банктарга жана каржы мекемелерине берген ипотекалык насыяларынын жалпы суммасы 10.82 млрд сомду түздү. 

2024-жылды алсак, былтыр ипотекалык насыяларга болгону 345.7 млн сом берилген. 2023-жылы болсо, МИК коммерциялык банктарга 554.95 млн сом, 2022-жылы – 3.9 млрд сом, 2021-жылы – 1.2 млрд сом берген. 2022-жылы ипотеканы каржылоого эң чоң сумма бөлүнгөн. 

Мамлекеттик ипотекалык компаниянын башчысы Темиркул Балтабаев «Акчабарга» билдиргендей, банктарга берилген акчанын азайганы компаниянын стратегиясынын өзгөргөнү менен байланыштуу. Даяр үй сатып алууга жеңилдетилген насыя берүүнүн ордуна МИК өзү турак жай курууга көңүл бура баштады.

“Турак үй кымбаттаганына байланыштуу рыноктогу абал өзгөргөндүктөн, биздин программанын арышы кыскарды. Эгер 2022-жылга чейин 1 млрд сомго биз дээрлик 700 үй-бүлөнү үй менен камсыз кыла алсак, 2022-жылдан кийин ал көрсөткүч азайып, азыр ошол эле суммага 300 үй-бүлө турак жайлуу боло алат. Көбүрөөк киши үйлүү болушу үчүн биз өз алдынча турак жай куруу тууралуу стратегиялык чечим кабыл алдык”, - дейт Балтабаев.

2023-жылдан тарта, турак жай куруу боюнча мамлекеттик программа алгач сыноо иретинде, андан кийин толук кандуу иштей баштаган. Компаниянын башчысынын айтымында, бул жарандарды үй менен камсыз кылуу маселесин гана чечпестен, турак жай фондунун көбөйүшүнө өбөлгө түзөт. 

“Мурда ипотекалык насыя гана бөлүнгөндө, биз рынокко дем берип, бирок турак жай курулушунда өсүш болгон эмес. Коммерциялык банк жана каржы-насыя мекемелериндеги ипотекалык насыяларды каржылоого бөлүнгөн каражаттар кайтарылганы карап курулуш иштерине жумшалат. Ошол эле учурда жаңы жана мурда салынган даяр үйлөрдү алуу механизмдери донорлук каражаттардын эсебинен ишке ашырылууда. Сөз даяр үйлөрдү сатып алуу багытталган программалар тууралуу болууда”, - дейт Балтабаев. 

Анын айтымында, бул демилгелер мамлекеттик ипотекалык курулуш жүргүзүлбөгөн аймактарда акырындык менен ишке ашырыла баштайт.