Бүгүн, 19-февралда, Бишкекте Камбар-Ата ГЭС-1 долбоорунун учурдагы этабы боюнча семинар өттү. Иш-чарага Кыргызстан, Казакстан жана Өзбекстандын өкүлдөрү, Дүйнөлүк банктын эксперттери, Швейцариянын AFRY инженердик-консалтинг компаниясынын жетекчилери жана эл аралык адистер катышты.

«Бүгүнкү жолугушуунун негизги максаты – Камбар-Ата ГЭС-1 долбоорунун учурдагы абалын, анын ичинде техникалык-экономикалык негиздемесин жана айлана-чөйрөгө жана социалдык чөйрөгө тийгизе турган таасирин баалоо», – деп белгиледи энергетика министри Талайбек Ибраев семинарды ачып жатып.

Семинар учурунда AFRY компаниясы, 2024-жылдын башында техникалык-экономикалык негиздемени (ТЭО) жаңыртуу үчүн тандалган компания катары, өзүнүн аралык жыйынтыктарын сунуштады.

Семинардын катышуучуларына, айрыкча, сейсмикалык баалоо, гидрологиялык изилдөөлөр, ошондой эле келечектеги гидроэлектростанциянын натыйжалуулугун, туруктуулугун жана коопсуздугун камсыз кылууга багытталган негизги техникалык элементтер жана долбоордук чечимдер көрсөтүлдү.

Долбоордун айлана-чөйрөгө жана социалдык чөйрөгө тийгизе турган таасирин баалоо боюнча жоопкерчиликти алган эл аралык SMEC компаниясы өзүнүн баштапкы изилдөөлөрүнүн отчетун сунуштады. Адистер долбоордун мүмкүн болгон таасиринин көлөмүн, анын ичинде жергиликтүү жамааттарга тийгизген таасирин талкуулашты. Ошондой эле, 2025-жылдын жаз айларында экологиялык изилдөөлөрдү жүргүзүү планы жана баалоону жыйынтыктоо үчүн негизги кадамдар белгиленди.

Камбар-Ата ГЭС-1 долбоорун даярдоонун кийинки этаптары – ТЭОну аягына чыгаруу, Кыргызстандагы жергиликтүү жана улуттук деңгээлдеги кызыкдар тараптар менен экинчи этаптагы консультацияларды өткөрүү, ошондой эле Казакстан жана Өзбекстандагы окшош талкууларды уюштуруу. Алынган пикирлердин негизинде айлана-чөйрөгө жана социалдык чөйрөгө тийгизе турган таасирди жакшыртылган версияда иштеп чыгуу пландалууда.

Бул семинар долбоорду ишке ашыруудагы маанилүү этап болуп, анын экологиялык, социалдык, техникалык жана финансылык жактан туруктуу энергетикалык чечим катары өнүгүүсүнө негиз болот. Дүйнөлүк банк долбоорду ар тараптуу даярдоого, анын ичинде ТЭОну жаңыртууга жана экологиялык жана социалдык таасирин баалоого каржылык колдоо көрсөтүүдө.

Камбар-Ата ГЭС-1 долбоору Борбор Азияда жашыл жана таза энергетиканы өнүктүрүү боюнча өзгөртүүчү кадам катары каралууда. Анын ишке ашырылышы Кыргызстандын энергетикалык коопсуздугун чыңдоого, туруктуу өнүгүүгө өбөлгө түзүүгө жана регионалдык кызматташтыкты бекемдөөгө жардам берет.