Жеке үйлөрдө жана батирлерде бала бакчаларды ачууга уруксат берилди. Бул тууралуу Бишкек шаардык мэриясынын басма сөз кызматы билдирди.

Учурда борбордун Ленин жана Биринчи Май райондорунда мектепке чейинки билим берүү кызматтарын көрсөтүү боюнча үч күндүк окуудан өтүүнү жана жаңы имараттарда үй тибиндеги бала бакча ачууну каалаган жарандардан арыздар жыйналууда.

“Мамлекеттик акселераторлор” программасынын “Мектепке чейинки билим берүү кызматтарын көрсөтүүдөгү тоскоолдуктарды азайтуу жана балдарды мектепке чейинки билим берүү менен камтууну жогорулатуу” долбоорун ишке ашыруу боюнча жумушчу топ кызыктар тараптар, ишкерлер, ошондой эле кварталдык, үй комитеттеринин өкүлдөрү менен жолугушууларды баштады. 

“Жумушчу топтун курамына Балдар укуктары боюнча ыйгарым укуктуу өкүл Асел Чынбаева, Ленин районунун акиминин орун басары Айзада Жунусова, Бишкек шаарынын билим берүү башкармалыгынын башчысы Айнура Арстамбекова, Билим берүү жана илим министрлигинин, Өзгөчө кырдаалдар министрлигинин, Санитардык-эпидемиологиялык жана Салык кызматынын өкүлдөрү кирди”, - деп айтылат маалыматта.

Жыйналышта турак жайларда (жеке үйлөр жана батирлер) үй тибиндеги балдар бакчасын ачуу мүмкүнчүлүктөрү айтылат.