Ушул жылдын 1-февралына карата Кыргызстанда 6 миң 305 бош орун бар экенин Эмгек, социалдык коргоо жана миграция министрлиги билдирди.

Учурда республикада расмий жумушсуздуктун деңгээли 1,8%ды түзөт. Ишке орноштуруу кызматтарында каттоодо турган жумушсуздардын саны 69,3 миң адамды түзөт, анын ичинен 49,8 миңи расмий түрдө жумушсузкатары катталган. Жыл башынан бери ишке орноштуруу кызматына 12 миң 246 жаран кайрылган.

Иш менен камсыз кылуу кызматынын жардамы менен 1 миң 283 адам иш менен камсыз болгон.

Жумушсуздардын эмгек рыногунда атаандаштыкка жөндөмдүүлүгүн жогорулатуу үчүн рынокто суроо-талапка ээ болгон кесиптерге окутуу жүргүзүлдү. Бул компьютер оператору, сатуучу агент, ашпозчу, косметолог, чач тарач, маникюр жасоочу, массажист, визажист, котормочу, 1С боюнча тажрыйбасы бар бухгалтер, тигүүчү, айдоочу, электр жана газ менен ширетүүчү, сантехник жана балчы.

2025-жылдын 1-февралына карата 507 адам убактылуу ишке орноштуруунун алкагында акы төлөнүүчү коомдук жумуштарга катышууга жөнөтүлгөн.