Бажы кызматкерлери жалпы наркы 1 млн 400 миң сомду түзгөн контрабандалык күрүчтү алып өтүүгө бөгөт коюшту. Бул тууралуу Мамлекеттик бажы кызматынан билдиришти.

“Түштүк-Батыш” бажысынын кызматкерлери тарабынан Ош-Ноокат унаа жолунда Scania үлгүсүндөгү жүк ташуучу унаа текшерүүгө алынып, ичинен жалпы салмагы 20 миң кг болгон “Лазер” күрүчү табылган.

“Э-О” ЖЧКсынын корутундусуна ылайык, кармалган товардын жалпы орточо базар баасы 1 млн 400 миң сомду түзөт.

Аталган факты боюнча Ош шаарынын прокуратурасынын тергөө бөлүмү тарабынан кылмыш иши козголгон.

Бүгүнкү күндө товардын ээси кармалган товарларды бажы тариздөөдөн өткөрүп, 328 миң сом өлчөмүндөгү тиешелүү бажы төлөмдөрүн төлөгөн.