Баткен облусунун Кадамжай районунда чакан ГЭС курулат.  Кубаттуулугу 600 кВт болгон кичи гидроэлектрстанциянын курулушуна кыргыз-орус өнүктүрүү фонду инвестиция салат.

Долбоордун баасы 40,1 миллион сомду түзөт. Бул сумманын жарымынан көбүн тагыраагы, 22 миллион сом аталган фонд тарабынан бөлүнөт.

"Бүгүн биз дагы бир келишимге кол коюп жатабыз, бул жолу кичи ГЭСти куруу боюнча. Ал бүтсө жергиликтүү тургундар электр энергиясынын жетишсиздигин түбөлүккө унутат деп ишенем", - деди  кыргыз-орус өнүктүрүү фондунун төрагасы Артем Новиков.

ГЭС ишке киргенден кийин жылына электр энергиясын өндүрүү 5,2 млн кВт/саатты түзөт. Муну менен Кадамжай жана ага жакын жайгашкан Марказ , Сары-Алтын айылдарынын калкын электр энергиясы менен камсыздоо маселеси чечилет деп күтүлүүдө.