Казакстандан Кыргызстанга мыйзамсыз ташылып келаткан 1,6 тонна койдун эти аныкталды.

Суу ресурстары, айыл чарба жана кайра иштетүү өнөр жайы министрлигинен билдиришкендей, мыйзамсыз жүктү Ветеринардык кызматтын "Кең-Булуң" чек ара ветеринардык көзөмөлдөө пунктунун инспекторлору кыргыз-казак мамлекеттик чек арасынан кармашкан.

Жүктө ЕАЭБдин ветеринардык-санитардык талаптары сакталбагандыгы, ошондой эле тиешелүү ветеринардык коштоочу документтери жок экендиги белгилүү болду.

"Инспекторлор тиешелүү артка кайтаруу актысын түзгөн соң жүк "Кең-Булуң" көзөмөл өткөрүү жайы аркылуу Казакстанга артка кайтарылды", - деп айтылат маалыматта.