VI кыргыз-орус экономикалык форумунун алкагында “Өнүгүү векторлору: жаңы реалдуулуктагы кыргыз-орус экономикалык кызматташтыгы” деген темада пленардык жыйын өттү. Ага Россия Федерациясынын Экономикалык өнүгүү министринин орун басары Дмитрий Волвач модератордук кылды.

Катышуучулар геосаясий жана экономикалык факторлордун өзгөрүшүнөн улам келип чыккан жаңы реалдуулуктун контекстинде Кыргызстан менен Россиянын ортосундагы экономикалык кызматташтыктын учурдагы жана келечектүү багыттарын талкуулашты.

Жолугушуунун негизги темалары катары жаңы өз ара аракеттенүү стратегияларын издөө, өсүү чекиттерин аныктоо жана россиялык бизнес үчүн Кыргызстандын инвестициялык жагымдуулугун жогорулатуу болду. Бизнести колдоо жана стимулдаштыруу чараларына, ошондой эле эки өлкөнүн ортосундагы экономикалык байланыштарды чыңдоодо каржы институттарынын ролуна өзгөчө көңүл бурулду.

"Эгерде жети жыл мурун биринчи кыргыз-орус форуму кыргыз-орус бизнесинин ортосундагы коммуникация аянтчасы катары түзүлгөн болсо, бүгүнкү күндө талкуулардын деңгээли, катышуучулардын делегациясы, ошондой эле кол коюлган документтердин көлөмү боюнча форум Кыргызстанда алдыңкы орундардын бирин ээлейт", - деп белгиледи өз сөзүндө кыргыз-орус өнүктүрүү фондунун башкармалыгынын төрагасы Артем Новиков.

Ал жаңы мезгил жаңы мүмкүнчүлүктөрдү ачып жатканын баса белгиледи. Алсак, иш-чаранын жыйынтыгында эле 200 миллион доллардан ашык суммадагы келишимдерге кол коюлары айтылды.

Пленардык жыйынга Экономика жана соода министри Данияр Амангелдиев, Соода-өнөр жай палатасынын башчысы Темир Сариев, Россия Федерациясынын Соода-өнөр жай палатасынын вице-президенти Дмитрий Курочкин, жаңы БРИКС өнүктүрүү банкынын директорлор кеңешинин мүчөсү Тимур Максимов, "Газпромбанк" ААКнын биринчи вице-президенти Олег Мельников жана "Росатом кайра жаралуучу энергия" ААКнын башкы директору Григорий Назаров катышты.

"Биз кызматташуу долбоорлорун ийгиликтүү өнүктүрүү үчүн финансылык гана эмес, ошондой эле институттук колдоо механизмдери керектигин түшүнөбүз. Ошондуктан биз өнөр жай кооперациясын колдоо боюнча долбоордук кеңсе түздүк, анын курамына биримдиктин бардык беш мамлекетинин өкүлдөрү кирди. Биздин максат ишканаларга кызматташууга байланышкан бардык маселелер боюнча жардам берүү жана алардын пикири улуттук деңгээлде да, Евразиялык экономикалык комиссияда да угулушун камсыз кылуу", - деди Россия Федерациясынын Соода-өнөр жай палатасынын вице-президенти Дмитрий Курочкин. 

Кыргызстан менен кызматташуу 2023-жылы түзүлгөн өнөр жай кооперациясын колдоо боюнча долбоордук кеңсе аркылуу кошумча колдоо алат. Анын курамына Евразиялык биримдиктин бардык өлкөлөрүнүн соода-өнөр жай палаталарынын өкүлдөрү кирди. Учурда долбоордук кеңседе 14 өнөр жай долбоору каралууда, анын үчөө Кыргызстандын ишканаларына тиешелүү.

Катышуучулар Кыргызстан менен Россиянын ортосундагы биргелешкен инфраструктуралык долбоорлордун жана логистиканын натыйжалуулугун жогорулатуунун маанилүүлүгүн, ошондой эле экономикалык кызматташтыкка инновациялык ыкмаларды киргизүү жана өлкөлөр ортосундагы өнөктөштүктү бекемдөө зарылдыгын белгилешти. Соода-экономикалык мамилелерди жакшыртуу жана инвестициялык долбоорлорду кеңейтүү боюнча конкреттүү сунуштар айтылды, алар эксперттердин айтымында, келечекте туруктуу өсүштүн негизги фактору болот.

Атап айтканда, жаңы БРИКС өнүктүрүү банкынын директорлор кеңешинин мүчөсү Тимур Максимов инвестициялык уюмдардын ичиндеги ички процесстерди тездетүүнүн маанилүүлүгүн белгиледи. Анын айтымында, мындай ыкма анын уюмуна долбоорлорду кароого кеткен убакытты кыскартууга жана каржылоону тездетүүгө жардам берди.

"Фондго кошулгандан баштап чечим кабыл алынганга жана биринчи транштарды бөлүштүрүүгө чейин бир нече ай гана өтүшүн камсыз кылдык. Бизнес үчүн бул ылдамдык маанилүү, жана биздин ыкмаларды жана иштөө ыкмаларын кабыл алган башка фонддор бизди мисал катары колдонушат. Биз Кыргыз Республикасы үчүн гана эмес, коңшу мамлекеттер үчүн да стандарт болуп калдык", - деп белгиледи Максимов.

Ал кошумчалагандай, бул өзгөрүүлөрдүн аркасында фонд рынокто алдыңкы орундарды ээлеп, эл аралык каржы институттары менен атаандаша алды.