2022-жылы илимий изилдөөлөргө 791 млн сом бөлүнгөн, каражат бөлүү 2018-жылга салыштырмалуу 19% өскөн. Бул тууралуу Билим берүү жана илим министрлигинен билдиришти. 

Маалыматка ылайык, 2022–жылы республикада 69 илимий уюм, анын ичинен жогорку билим берүү секторунун үлүшүнө 33% жана академиялык сектор уюмуна 30% туура келген.

“2022 - жылы академияда илимий ишмердикти 1 миң 235 адам ишке ашырып, алардын ичинен 125 илимдин докторлору жана 280 адам илимдин кандидаттары болушкан. Кызматкерлердин жалпы санынын 52% аялдар түздү”, - деп айтылат маалыматта. 

Мындан тышкары, былтыр 614 аспиранттар бүтүрүлүп чыгарылган. Алардын эң көп үлүшү медициналык (23%), экономикалык (11%), педагогикалык жана техникалык (10%) илимдин тармактарына туура келген.