Кыргызстан көп жылдар бою Токтогул ГЭСин жана Бишкек ЖЭБин тез арада реконструкциялоого муктаж болгонуна карабай, талаптагыдай модернизациясыз иштетип келген. Бул тууралуу президент Садыр Жапаров бүгүн, Энергетика министрлигинин 90 жылдыгын белгилөө учурунда билдирди.

Мамлекет башчысы буга чейин өлкөнүн энергетика тармагына өзгөчө кырдаал режими да киргизилгенин эске салды. Бирок андан бери тармакта бир катар реформалар жүргүзүлүп, коррупцияны жоюуга, ресурстарды үнөмдүү пайдаланууга өзгөчө көңүл бурулганы белгиленди.

Президенттин айтымында, ГЭСтерди жана күн электр станцияларын куруу боюнча келишимдер түзүлдү. 2024-жылдын августунда Садыр Жапаров таза энергетикалык долбоорлорго инвестиция тартууга багытталган жарлыкка кол койгон.

"Биз энергетика тармагындагы инвесторлорго бир катар салыктык жеңилдиктерди беребиз", - деп белгиледи ал.

Президент ошондой эле учурда 20 ГЭС ишке берилгенин, дагы 27си курулуп жатканын билдирди.